Айтбаев Оспан Сәрсенбекұлы үшін энергетика - тек мамандық қана емес, өмірлік мәні бар қызмет. Салада 20 жылдан астам тәжірибесі және басқару саласындағы терең білімі бар Оспан Сәрсенбекұлы бүгінде энергокомбинаттың негізгі бөлімшелерінің бірі – ЖЭО-2-нің директоры болып қызмет етеді. Оның энергетика саласына деген қызығушылығы Маңғыстау энергетикалық колледжінде, кейін Ақтау Мемлекеттік Университетінде оқыған кезінде басталды. Ол «Инженер-жылу энергетигі» мамандығын алып, білімін шыңдады. 2001 жылы Оспан Айтбаев «МАЭК» ЖШС-дегі еңбек жолын бастап, электромонтер лауазымынан басшылық қызметке дейін көтерілді.
Станция басшысы бос уақыты аз болса да, арасында шахмат ойнап, өзінің сүйікті гитарасын қолға алуға уақыт табады. Біздің газетке берген сұхбатында ол ЖЭО-2 алдында тұрған ағымдағы міндеттері мен жоспарлары туралы айтып, саланың болашағы туралы өз көзқарасымен бөлісті.
Оспан Сәрсенбекұлы, әңгімені энергетика саласына қалай келгеніңізден бастасақ?
- Мен жасымнан әртүрлі схемалармен жұмыс істегенді ұнататынмын, сондықтан болар, энергетика саласы да әуел бастан менің жүрегіме жақын болды, кейін бұл менің өмірлік бағытыма айналды. Бір жағынан маған әкем мен ағам энергетикаға баруға кеңес берді, өйткені «жарықсыз өмір мүмкін емес, демек, бұл мамандық әрқашан сұранысқа ие болады. Электр энергиясы, жалпы энергетика біздің өмірімізге қажет ең маңызды ресурс, сол себепті мен осы мамандықты таңдадым. Қазірде «МАЭК» ЖШС-де қызмет ете жүріп, мен бұған күн сайын көз жеткіземін, әрі өзімнің еліміздің өркендеуіне үлкен үлес қосып жүргенімді сезінемін.
Сіз өзіңіздің кәсіби қызметіңізде үлкен еңбек жолынан өттіңіз. Өз жұмысыңызда сізге не ұнайды?
- Мен үшін энергетикалық жабдықтармен жұмыс істеу тек кәсіби қызығушылық қана емес, сонымен қатар өзіме қуаныш сыйлайтын қызмет десем болады. Барлық жабдықтар тоқтамай, үзіліссіз жұмыс істеп тұрса, сіз адамдар үшін маңызды қызмет атқарып жүргеніңізді түсінесіз. Сондай-ақ, үлкен ұжыммен жұмыс істеу де маған дәл сондай сезім сыйлайды. Мен өз ұжымымды жақсы көремін, өз қызметкерлерімді көргенде олардың дені сау екенін, отбасыларында бәрі жақсы екенін білгенді ұнатамын.
Сіз ұжымның маңыздылығы туралы айттыңыз. ЖЭО-2 сияқты ірі және жауапты нысанды тиімді басқару үшін басшыға қандай қасиеттер қажет?
- Ең алдымен, тәртіп пен кәсібилік. Энергетика - бұл жай ғана қызмет саласы емес, бұл адамдардың өмірі мен бүкіл саланың тұрақты жұмысын қамтамасыз ету жауапкершілігі. Көшбасшы тек жақсы маман ғана емес, сонымен қатар тамаша ұйымдастырушы болуы керек. Сіз командада жұмыс істей білуіңіз керек, әріптестеріңіз бен қарамағыңыздағы қызметкерлерді тыңдап, уақытында шешім қабылдай білуіңіз керек. Әрине, әр басшыға бетпе-бет келетін қиындықтардан қорықпау өте маңызды, бастысы - оларды жеңе білу.
ЖЭО-2 директоры лауазымындағы тәжірибеңізден қандай маңызды сабақтар алдыңыз?
- Ең бастысы - бір командада жұмыс істей білу. Персоналдардың біліктілік деңгейін уақтылы арттыру. Өз қателіктеріңізді ерте анықтау, олардан сабақ алу және оларды ешқашан қайталамау маңызды. Шешім қабылдау кезінде кейде сіз өзіңіздің түйсігіңізге сүйенуіңіз керек. Біздің салада тек кәсіпқойлық жеткіліксіз. Біз өз мамандығымызды жақсы көруіміз керек. Энергетиктер - бұл өз қызметін беріліп атқаратын адамдар.
Кадрмен жабдықталу жағдайы қалай және білікті мамандарды тарту үшін қандай шаралар жасалуда?
- Персоналды сауатты іріктеу кез келген кәсіпорын табысының негізгі құрамдас бөліктерінің бірі болып табылады. Бүгінгі таңда жоғары техникалық білімі бар жас мамандарды тартуға ерекше назар аударғым келеді. 2024 жылы біз жастар практикасы бағдарламасы аясында 4 түлекті жұмысқа қабылдадық, олардың 3-і бізде жұмыс істеуге қалды. Қызметкерлердің өздерін жайлы сезінуі, олардың біліктілігін арттыруға ерекше назар аударылуы және өз еңбектеріне лайықты сыйақы алуы үшін жағдайлар жасау маңызды.
Сіздің ойыңызша, ЖЭО қызметкерлері қандай нақты дағдылар мен қабілеттерге ие болуы керек?
- ЖЭО қызметкерлері жаңа технологияларды тұрақты түрде оқуға және игеруге дайын болуы, жабдықтар мен жүйелерді жақсы білуі тиіс. Қолайсыз, күрделі жағдайда жұмыс істей білу, жұмысқа қажет ақпараттарды тиімді пайдалану және түрлі жағдайларда шұғыл, ұтымды шешім жасай білу маңызды. Технологиялық сауаттылық және командада жұмыс істеу қабілеті де табысты жұмыстың негізі болып табылады.
Сізге тиімді жұмыс істеуге және ЖЭО-2-де туындайтын техникалық мәселелерді шұғыл шешуге не мүмкіндік береді?
- Біз жабдықтарды жаңғырту және оны жөндеу, сондай-ақ ескірген жабдықтарды кезең-кезеңімен ауыстыру жұмыстарын үздіксіз жүргіземіз. Жабдықтардың едәуір бөлігінің қолданылу мерзімі әлдеқашан өткен, бірақ біз солай екен деп қарап отырған жоқпыз. Станциядағы жұмыс барысында бүкіл ұжымның жауапкершілігі мен кәсібилігі шешуші рөл атқаратыны маңызды. Бұл туындаған техникалық мәселелерді ұтымды шешуге мүмкіндік береді.
Сонымен, аймақтың энергетика саласының болашағы туралы сіздің көзқарасыңыз қандай?
- Маңғыстау энергетикасы барлық қиындықтарға қарамастан дамуын жалғастыруда. Біз сын-қатерлерге дайын болуымыз керек және өңірімізге энергияны тұрақты түрде жеткізуді қамтамасыз ету үшін барлық мүмкіндіктерді пайдалануымыз керек. Болашақта біз қолданыстағы қуаттарды жаңғыртып қана қоймай, өңіріміздің дамуына ықпал ететін жаңа технологияларды да енгіземіз деген үміттемін.
Оспан Сәрсенбекұлы, сұхбатқа уақыт бөліп, сұрақтарымызға жауап бергеніңіз үшін алғыс айтамыз. Сіздің кәсіби қызметіңізге табыс тілейміз!