Жыл сайынғы дәстүр бойынша кәсіпорынның Мемлекеттік емес өртке қарсы қызметінің ұжымы қаладағы балалар ауылының тәрбиеленушілерін қонаққа шақырып, қайырымдылық шарасын өткізді. Орталық алаңға тігілген ағаш үйге тағам түрлері мен тәттіге толы мол дастархан жайылып, балапандар құрметпен төрге отырғызылды. Бөлімше басшысы бастаған әріптестер кішкентай қонақтарға жылы сөздерін арнап, олармен бірге ән салып, би билеп көтеріңкі көңіл-күй сыйлады.  

      Бөлімше қызметкерлері балаларға өрттің қаупі мен салдары, қорғану жолдары, өрт сөндірушінің күрделі қызметі туралы әңгімеледі. Кішкентай қонақтар өрт сөндіру құралдарымен, техникаларымен танысып, ұжым қызметкерлерімен естелік суретке түсті.

       «Біздің балалар үйінде 41 бала тәрбиеленуде. Ұл-қыздарымыз өте тәрбиелі, тәртіпті, білімді. Болашағынан үлкен үміт күттіретін балалар өсіп келеді. Бүгін осында солардың жартысы келді, қалғандары сабақта, үйірмелерде. Жыл сайын ораза айының соңында осы бөлімше ұжымы балаларымызды қонаққа шақырып, құрмет көрсетеді. Біз «МАЭК» ЖШС басшылығы мен қызметкерлеріне балаларға тәрбиелік мәні зор кездесу ұйымдастырғаны үшін алғысымызды білдіреміз,- дейді Облыстық отбасы үлгісіндегі балалар ауылының директоры Айгүл Байбатырова.

         МЕӨҚҚ басшысы Вусал Юсифов балаларға баянды өмір, бақытты болашақ тілеп, оларды бастап келген облыстық отбасы  үлгісіндегі балалар ауылының директорына ұжымның ұлағатты қызметі үшін Алғыс хат табыстады.