Бұл күні барша әйелдер қауымы ер-азаматтардың, ұлдарының ыстық ықыласына, ерекше құрметіне ие болады. Көктеммен бірге келетін осынау мейрамда қыз-келіншектер мен әжелерге жасалар жақсылықтар да, сый-сияпаттар да жетерлік. Биыл Маңғыстауға көктем кеш келердей, ызғар жел мен суық күндердің беті қайтар емес. Әйтсе де, «амалдың ақша қарын», «итбалықтың кіндік қатырмасын» күтіп үйренген жерлестеріміз табиғаттың анау-мынау тосын «мінезіне» үйренген. Ал, наурыздың алғашқы күндерінде келіп жететін осы бір шуақты мереке ауа райы қандай болса да, баршамыздың жүрегімізге жылу ұялатып, ерек сезімге бөлейді. Жігіттер қауымы сүйікті аналарына, сүйген жарына, сүйкімді қарындастары мен апаларына гүл дестелерін ұсынып, кішкентай «ханшайымдардың» да қалағанын алып беруде.
Көктемнің ең жарқын, ең әдемі мерекесі - халықаралық әйелдер мейрамы біздің кәсіпорында да аталып өтті. Ұжымдағы жігіттер қауымы салтанатқа жиналған барлық әйелдерді гүл шоқтарымен қарсы алып, сыйлықтар үлестірді. Келуші қыз-келіншектердің күлімдеген жүздерінен, ерекше көңіл-күйлерінен осынау әсем көктемнің лебі сезілгендей. Шіркін-ай десеңші, шаңырақтың шаттығы, жер жаһанның сәні мен салтанаты, бәрі-бәрі тек қана осы әйелдердің қас-қабағына қатысты ма деп қаласың кейде... Сәл жымиып, күлімсіресе болды әлемнің жарығын сыйлап, өзіңе қанат бітіретіні сөзсіз.
Комбинаттың әйелдер қауымын көктемнің тамаша мерекесімен құттықтау үшін мінбеге шыққан кәсіпорынның Бас директоры Қайрат Абдрасилов: «Бүгін осынша қыз-келіншекке тілек арнағалы тұрмын. Шынын айтқанда, осындай кереметке, сұлулыққа көз тұнып тұрғандай... сөйлеу де оңай емес...»,-деп қонақтардың көңілін бір көтеріп қойды. Аз-кем үзілістен кейін сөзін жалғаған бас директор нәзік жандыларға мерекелік лебізін білдіріп, өмірдің бар сәттіліктерін, отбасының амандығы мен бақытын тіледі. Комбинат басшылығы атынан еңбекте ерекшеленген бірнеше әйел азаматтарға алғыс хаттар табысталды.
Салтанатты шара соңы Абай атындағы мәдениет үйінің «Радуга» әншілер тобы, С.Сариев жетекшілік ететін «Жорға» би тобының және «Молодость» джаз оркестрі өнерпаздарының қойылымымен жалғасты.