Жылдағы дәстүр бойынша өткен жылдың қорытындысымен «Жылдың үздік қызметкері» атағына ие болған әріптестеріміздің тізімі белгілі болды.

        Өткен төрт тоқсанда кәсіпорындағы өндірістік процеске ерекше үлес қосып, жоғары кәсіби шеберліктерін  танытқан бөлімшелер мен цехтардың төрт жұмысшы, қызметкері осы абыройлы атаққа лайық деп табылды. Олардың қатарында «Тәжірибе және тәлімгерлік» номинациясы бойынша кәсіпорынның Жөндеу зауытының қызметкері Бағдат Қадыров та бар.

         Бағдат Қадыров «МАЭК» ЖШС-де 1996 жылдан бері еңбек етеді.  Жөндеу зауытының №1 орталықтандырылған жөндеу цехында 4 санатты слесарь-жөндеуші болып қызметін бастаған  ол бүгінде жоғары дәрежелі кәсіби мамандардың бірі. Бағдат Қамысбайұлы  өз біліктілік деңгейін арттыра жүріп,  2016 жылы  7 разрядты құбыр тазалау машинасының машинисі болып еңбек жолын жалғады. Өткен жылы Бағдат Қадыров Жөндеу зауытының Жылу-техникалық жабдықтарын жөндеу мастері болып тағайындалды. Оның қызмет барысында күрделі міндеттерді тез шеше білуі, ұжымның жұмысын ұйымдастыруы және үнемі жұмыскерлердің қауіпсіздігін басты назарға алуы оны жауапкершілігі жоғары, көшбасшы маман ретінде танытты.

      Осы жылдар ішінде ол «Комбинаттың еңбек сіңірген қызметкері» және «Комбинаттың еңбек ардагері» атақтарымен марапатталды, сондай-ақ ҚР Энергетика министрлігінің «Еңбек сіңірген энергетик» төсбелгісін алды.

      2024 жылдың қорытындысымен  ол кәсіпорында «Жылдың үздік қызметкері» атанды.

      Ол жас мамандарды мамандықтың қыр-сырына үйретіп жүрген тәжірибелі тәлімгер, шебер маман ретінде әріптестеріне үлгі болып жүрген өз ісіне адал азамат.