Қазақстанда Энергетиктер күні желтоқсанның үшінші жексенбісінде атап өтіледі. Бұл кәсіби мереке Маңғыстау атом энергетикалық комбинатының қызметкерлері үшін ерекше маңызға ие. Осы жылы кәсіби мереке  Қазақстанның Тәуелсіздік күнімен тұспа-тұс келді. Сондықтан, кәсіпорын ұжымы қос мереке салтанатын бірге атап өтті.

            Мерекелік жиында "МАЭК" ЖШС Бас директоры Кинис Орақов құттықтау сөз сөйлеп,  әріптестерге ақжарма тілегін арнады. Ол энергетика саласы мамандарының мемлекеттің тұрақтылығы мен дамуына қосатын үлесі, сондай-ақ, еліміздің энергетикалық қауіпсіздігін қамтамасыз етуде алатын орнын ерекше атап өтті.         

            Мерекелік салтанатта кәсіпорынның 10 ардагері көп жылғы еңбегі мен комбинаттың дамуына қосқан үлесі үшін Маңғыстау облысы әкімінің Алғыс хатымен марапатталды. Еңбек ардагерлері қызметке адалдық пен кәсібиліктің үлгісін көрсетіп, білікті мамандар дайындап, комбинаттың дамуына өлшеусіз үлес қосқан ардақты жандар. Еңбек ардагерлері атынан кәсіпорында  ұзақ жыл қызмет еткен Валентина Крамер   құттықтау сөз сөйлеп, энергетик болып еңбек ету үлкен еңбекті, жауапкершілікті және адалдықты қажет ететін маңызды миссия екенін атап өтті.

            Маңғыстау облысы әкімінің және кәсіпорын бас директорының Құрмет грамоталары және Алғыс хаттарымен комбинаттың 68 қызметкері еңбек жетістіктері үшін марапатталды.

            Сонымен қатар, мерекелік салтанатта "2024 жылдың үздік қызметкерлері" атағы берілген әріптестеріміз жарияланып, марапаттар табысталды.  Олардың қатарында:

* "Тәжірибе және тәлімгерлік" номинациясында — Жөндеу зауытының 7-разрядты құбыр тазалау машиналарының машинисі Бағдат Қадыров,

* "Үміт және перспектива" номинациясында — ЖЭС 5-разрядты химиялық талдау зертханашысы Меруерт Базарбаева,

* "Тиімділік және нәтиже" номинациясы бойынша — ЖЭО-2 Электр цехының ауысым бастығы Виктор Онищенко,

* "Кәсібилік және шеберлік" номинациясында - Желілер мен қосалқы станциялар цехының 6-разрядты қосалқы станцияларға қызмет көрсету жөніндегі электромонтері  Ерлан Көшбаев бар.

            "МАЭК-Қазатомөнеркәсіп" жергілікті кәсіподағының төрағасы Асланбек Өтебаев қызметкерлерді келе жатқан мерекелерімен құттықтап, 2024 жылғы МАЭК спартакиадасының жеңімпаздарына кубоктар табыс етті. Биыл жалпы командалық есепте Қауіпсіздік қызметі(1 орын), Жөндеу зауыты (2 орын) және ЖЭС (3 орын) қызметкерлері жеңімпаз атанды.

            Іс-шараның ресми бөлімінен кейін комбинат қызметкерлері мерекелік концертті тамашалады.