Еңбек ардагері Троценко Георгий Матвеевичтің 93 жылдығына орай «МАЭК» ЖШС басшылығы ардагерлер кеңесімен бірлесіп мерейтой иесін осы айтулы күнмен құттықтау үшін келді.

        1932 жылы туған Георгий Матвеевич өзінің саналы ғұмырын энергетика саласына арнап, 1965 жылдан 2016 жылға дейін «MAЭК» ЖШС-де еңбек етті. ЖЭО-М-де қарапайым электрик болып қызмет бастаған   ол  ЖЭО-2 бас инженері лауазымына дейін көтеріліп, кәсіпорынның дамуына айтарлықтай үлес қосты.

       Ардагерге «МАЭК» ЖШС Бас директорының  орынбасары Ерқанат Ибадуллаев бас директор Кинис Орақовтың құттықтау хатын табыстады. Құттықтауда Георгий Матвеевичке көп жылғы қажырлы еңбегі және комбинат пен өңірдің дамуына қосқан үлесі үшін алғыс сөздер жазылып,  зор денсаулық, ұзақ өмір және оның отбасына амандық тіледі.

        Сонымен қатар, ақсақалды құттықтау туған күнімен қатар келген жарқын мерекелер - Наурыз мейрамына және 20 наурызда атап өтілетін Халықаралық Бақыт күніне орайластырылды.

        Ардагерді  құттықтауға арнайы келген комбинаттың Еңбек ардагерлері кеңесінің өкілдері де, мерейтой иесіне жүрекжарды тілектерін арнады.

      Қосағымен қоса ағарып, 66 жыл бірге ғұмыр сүрген Георгий Матвеевич пен оның жары Лидия Григорьевна қонақтарды жылы қарсы алды. Дастархан басында ардагерлер естеліктерімен бөлісіп, еңбек еткен жылдардағы қызықты оқиғалар туралы әңгімеледі. Кәсіпорын өкілдері мен жас буын мамандарға өз тілектерін жеткізіп, ризалықтарын білдірді.

        МАЭК өз ардагерлерінің жанқиярлық еңбегі, артына қалдырған мол  тәжірибелерін бағалап,  олардың жас мамандарға үлгі болатын  өмір жолдарын мақтан етеді.